झिन रोबे बाई मोर

Created : Teras Kaiwartya (Aansu)
Date : 14/01/2016
झिन रोबे दाई मोर झिन रोबे बाई मोर।
रात दिन गुनत तंय ह झिन रोबे न।

अकेला ही जाहूँ , कोनो नइ जावय संग म।
झुलत रही मुहरन , तोर नजरे नजर म।
भुइयां म आके , झिन जियव घमंड म।
काँटा खूँटी झिन गड़व, जिन्गी डहर म।
राख हो जाही ये माटी म काया -2
पिरित के बिरवां ल बोंबे न।
झिन रोबे बाई मोर .....

लइका ल बने तंय , पढ़ा अउ लिखा के।
ओमन के जिन्गी ल , उज्जर बनाबे।
नान्हे बड़कू रिश्ता , मान सीखा के।
सुग्घर सिरजा के , भल मनखे बनाबे।
हिम्मत करबे आँसू ल पोछ के -2
गरु के गठरी ल बोहले न।
झिन रोबे दाई मोर .....

छत्तीसगढ़ माटी के , मंय तेरस हंव बेटा।
धनहा डोली हावै , मोर सोन के डोला।
तहूं बाप बनबे , मोर दुलरवा तंय बेटा।
लबारी छोड़ ईमानदारी , बताबे सबो ला।
आवा गमन दुनिया के रिवाज हे -2
मोला खांध म तंय ढ़ोबे न।

झिन रोबे बाई मोर झिन रोबे दाई मोर।
रात दिन गुनत तंय ह झिन रोबे न।
झिन रोबे भाई मोर झिन रोबे बेटा मोर।
झिन रोबे बहिनी मोर झिन रोबे दीदी मोर।
रात दिन गुनत गुनत झिन रोबे न।

            रचना - तेरस कैवर्त्य (आँसू)
               सोनाडुला, (बिलाईगढ़)
     जिला - बलौदाबाजार - भाटापारा (छ. ग.)
             मोबा. - 9165720460
email:aansukai4545@gmail.com