" मोर छत्तीसगढ़ "

Created by :- Teras Kaiwartya(Aansu)
Date : 05/07/2015 *छत्तीसगढ़ी गीत* (पारंपरिक)
~~~~~~~~~~~~~~~~~~~~~~~~~~~~
B-मोर छत्तीसगढ़ मइयां।
    परथंव मंय तोरे पइयां।
    बासी के खवइया मइयां हो sssss
    सुग्घर बोली मीठ लागे न। होsss मइयां हो
    हरियर अँचरा नीक लागे न।
G- मोर छत्तीसगढ़ मइयां।
     परथंव मंय तोरे पइयां।
     बासी के खवइया मइयांं होssss
     सुग्घर बोली मीठ लागे न। हो ss मइयां हो
     हरियर अँचरा नीक लागे न।
B- सुवा पंथी करमा ददरिया, नाचा मन ल भावय ग।
    झांझ मंजीरा घुँघरु मांदर, संगे संग सुनावय ग ।
    नाचे कलगी मुड़ म खोंचे।

    गौरा गौरी मुड़ म बोहे।
    धोती कुरता म रउत नाचय sss
    पंडवानी के गवंइया। मइयां हो ss
    सुग्घर बोली मीठ लागे न। हो मइयां हो ss
    हरियर अँचरा नीक लागे न।
G-मेहनत मंजूरी खेती किसानी, जिन्गी भर ले करना हे।
    पोइल्का लुगरा ककनी बहुंटा, रंगे रंग के गहना हे।
    टोरे नहना चला के जांगर,।

    खांध तुतारी धरके नांगर।
    कुकरा बासत उठ के बिहना sss
    मुखारी के घसइया। मइयां हो ss
    सुग्घर बोली मीठ लागे न। हो मइयां हो ss
    हरियर अँचरा नीक लागे न।
B-नरवा नदीया डबरी तरिया, निरमल पानी बोहावथे।
    छत्तीसगढ़ के कोरा म, मोंगरा गोंदा महमहावथे।
    राम के शवरीन दाई जिहाँ।
    जगा जगा महामाई इहाँ।
    नदिया तीर तीर डोंगरी तीर तीर sss
    जन्मे नारायण वीर बिलासा। मइयां होss
    सुग्घर बोली मीठ लागे न। हो मइयां हो ss
    हरियर अँचरा नीक लागे न।

G- घासी बाबा जन्मे जिहाँ, मोर गिरौदपुरी धाम हे।

    सत के सादा धजा फहरे, बड़े देश के जैत खाम हे।

    यही माटी म कबीर कुटिया।

    अउ बिराजे बाबा बिरितिया।

    दया बरसे देश के भुइयाँ sss

    आँसू पोछत हावे कर्मा। मइयां हो ss

    सुग्घर बोली मीठ लागे ना। हो मइयां हो ss

    हरियर अँचरा नीक लागे न।
G-बरा ठेठरी खुरमी सोहांरी, गुरतुर पाग के अइरसा हे।
    चना मुर्रा लाडु चबनिया, चटनी संग पेज पसिया हे।
    भरे खजाना राज हमर म,।

    डोंगरी झाड़ी फबे डहर म।
    सिरजे हवय हीरा भाखा sss
    ढ़रथे मया अउ पिरीतिया।मइयां होss
    सुग्घर बोली मीठ लागे न। हो मइयां हो ss
    हरियर अंचरा नीक लागे न।
B- मोर छत्तीसगढ़ मइयां.. ....
G- मोर छत्तीसगढ़ मइयां ....

    गीतकार - तेरस राम कैवर्त्य (आँसू )
          सोनाडुला , (बिलाईगढ़)
      जिला - बलौदाबाजार (छ. ग.)
         मो.- 9165720460
                7770989795
  email : aansukai4545@gmail.com