* तंय बिराजे दाई *

Created by -Teras Kaiwartya(Aansu)
Date : 04/01/2018
~~~~~~~~~~~~~~~~~~~~~~~~~~
डोंगरी पहाड़ म ओ, अमरइया खार म।
तंय हर बिराजे दाई, कदली कछार म।
आजा बे आजा बे आजा बे ओ।
आजा बै चैत अउ कुंवार म।
डोंगरी पहाड़ म ओ, अमरइया खार म।
तंय हर बिराजे दाई कदली कछार म।

आमा के मउर, मउरत हावय ओ।
सुवा अउ कोयली कुहकत हावय न।
बगीया म फूल, फूलत हावय ओ।
भौंरा अउ भांवर, किंदरत हावय न।
दरसन बर आये तोर दाई।
दीदी बहिनी संग भाई।
तोरे मया के दुवार म।
डोंगरी पहाड़ म ओ, अमरइया खार म।
तंय हर बिराजे दाई, कदली कछार म।

डोंगरी पहाड़ म ओ, अमरइया खार म।
चल संगी नाच लेबो, करमा के डार म।
आजा बे आजा बे आजा बे ओ।
आजा बे मांदर के ताल म।
डोंगरी पहाड़ म ओ, अमरइया खार म।
चल संगी नाच लेबो, करमा के डार म।

मया के छंइहा, हमर बर कर दे ओ।
छुटे बंधना ल, जबर के जोर दे न।
भुखिया के कौरा, बजर भर भर दे ओ।
अंचरा के छाजन, निरधन बर घर दे न।
आँसू धरत ले करलाइ।
सुन ले न ओ समलाइ।
कल्पत नीचत गोहार ल।
डोंगरी पहाड़ म ओ, अमरइया खार म।
तंय हर बिराजे दाई, कदली कछार म।




स्वरचित - तेरस कैवर्त्य (आँसू )
     सोनाडुला (बिलाईगढ़)
  जिला - बलौदाबाजार (छ. ग.)