लड़का -
तोर मीठ बोली मोला मोह दारे मोर रानी sss
अइसे का जादू डारे मन मा तँय मोर दीवानी।
पातर कनिहा मटका देहे न,
रेंगते रेंगत अँखिया देहे ना ss
कइसे मता दारे पीया के महुंआ के पानीss
तोर मीठ बोली मोला मोह दारे मोर रानी।
लड़की -
जेती जाथव तिहाँ काबर जाथस रे मोर पाछूsss
कभू बेड़हा रेंगे कभू तीर - तीर रे मोर आघू
लूका - लूका मोला तँय देखे ना,
घोर गली जब -जब भेंटे गाss
मँय मया नी जानव जारे जा लफाडूsss
जेती जाथव तिहाँ काबर जाथस रे मोर पाछू।
अंतरा :- लड़का -
चंदा कस तोर सुरतिया, अंजोरी रस्ता बताथे ओ।
होंठ के लाली माथ के बिंदिया अब्बड़ मोला सुहाथे ओ
मुचमुच ले तोर हँसना, जिवरा ल बड़ धड़काथे ओ।
सुरता म तोर नींद नई आवे रथिया रथिया जगाथे ओ।
बोली बचन सुन ले, अब तो गोरी मोला चुन ले।
मोर बसे हस अंतस म, तँय समाये हस नस-नस मsss
एके हो जाथेन दुनो परानीss
तोर मीठ बोली मोला मोह दारे मोर रानी।
लड़की -
करथस का अब्बड़ मया, मोर घर सगा ले आजा गा।
दाई ददा ल मनाई लेबे, लाबे बराती संग बाजा गा।
मड़वा म भांवर परा ले, हो जाहूँ तोरेच चिन्हारी रे।
जनम भर आधार बन तँय, मँय तोर मया के नारी रे।
मोला कभू झिन भूलाबे, आँसू कभू झिन बोहाबे।
जिन्गी हे तोर बस मा, हिरदे म भर ते रसना sss
मँय बन जाहूँ चखना, तोर बर रे मोर मयारु।
जेती जाथव तिहाँ काबर जाथस रे मोर पाछू।
लड़का - तोर मीठ बोली मोला मोह दारे मोर रानी।
कइसे मता दारे पीया के महुंआ के पानी।
लड़की - जेती जाथव तिहाँ काबर जाथस रे मोर पाछू।
मँय बन जाहूँ चखना तोर बर रे मोर मयारु।
लड़का - कइसे मता दारे पीया के महुंआ के पानी।
लड़की - मँय बन जाहूँ चखना तोर बर रे मोर मयारु।
गीतकार :-
तेरस कैवर्त्य "आँसू"
सोनाडुला (बिलाईगढ़)
जिला - बलौदाबाजार (छ. ग.)
मो. - 9165720460, 9399169503
इमेल - aansukai4545@gmail.com
